الزيوت الاساسية و قوتها✨✨

عايزة شعرك يكون اتقل و بيطول بسرعة؟ الزيوت الأساسية ممكن تساعدك تنمي شعرك، تقلل تساقط شعرك و تلمع شعرك! في المقالة دي، هنناقش أهمية الزيوت الأساسية، فايدتها لشعرك و طرق استخدامها المُختلفة لأحسن النتايج. اتجمعوا يا بنات، هن- ميكس

الزيوت الأساسية هي الزيوت المُستخرجة من النباتات مباشرة، مش مُخففة و بدون إضافات و كيماويات و بتفضل محافظة على طعم والخصائص العطرية للنبتة. بيتم استخراج الزيوت الأساسية عن طريق التقطير  ( بالبخار و/أو المياه ) أو بطرق كيماوية زي الترشيح البارد. زيت الافندر، الروزماري، النعناع، البرجاموت و زيت شجرة الشاي.. أكتر الزيوت الأساسية الدارج استخدامها في مصر اللي بينفعوا فتقريباً كل الوصفات أي أن كانت احتياجاتك لكن دايماً محتاجين يتخففوا بزيت/زيوت وسيطة – زي زيت الجوجوبا أو جوز الهند – و ده بسبب كثافتها العالية. الزيوت الأساسية مفيدة بشكل كبير للجسم، هم أحسن بديل للمواد الكيماوية الخطيرة ويسيبوا شعرك ناعم، صحي و بيلمع. خلط الزيوت الأساسية مع الزيوت الوسيطة بيحسن صحة الشعر لإنهم بيحفزوا الدورة الدموية و بالتالي وصول التغذية لبصيلات الشعر بشكل أفضل لشعر صحي أكتر.. ده غير انه بيعالج مشاكل كتير زي جفاف فروة الراس، الحكة و نقص الفيتامينات اللي بيسبب وقوع الشعر. 

بس بعد كل ده.. هنستخدمه إزاي؟

الطريقة #1

زودي كام نقطة من الزيت الأساسي على الشامبو، البلسم أو حمام الكريم المُفضلين عندك لأحسن النتايج.

الطريقة #2

أعملي المزيج الي تحبيه من الزيوت الأساسية (الموجودين في القائمة تحت) حسب أحتياجات شعرك و فروة راسك و زوديهم على كمية كبيرة من خليط الزيوت الوسيطة زي الجوجوبا، الارجان، جوز الهند أو اللوز الحلو.

زيت اللافندر: مشهور بانه الأحسن لتسريع عملية نمو الشعر. زيت مهدئ لفروة الرأس من أي تهيجات أو جفاف ده غير أنه عنده خصائص مضادة للميكروبات و الجراثيم.

زيت الروزماري: بيسرع عملية نمو الشعر، بيتقل الشعر و يقويه. فدراسة اتعملت سنة ٢٠١٥ بعنوان  

“Rosemary oil vs minoxidil 2% for the treatment of androgenetic alopecia: a randomized comparative trial”

، أُثبت علمياً إن زيت روز الماري  عنده القُدره علي تحفيز نمو الشعر و علاج تساقطه بالظبط بنفس كفاءة المادة الكيماوية ” المينوكسيديل ” اللي بتُستعمل كعلاج لتساقط الشعر و بتتحط في الكريمات. لو حابة بديل للمواد الكيماوية بنفس النتايج المُبهرة فزيت الروزماري لازم يكون فوصفتك. غير كل المميزات دي، فهو كمان بيساعد في علاج الحكة و القشرة.

 

زيت النعناع: بسبب ريحته المُنعشة فهو المُفضل عند ناس كتيرة، بيساعد على تجديد الخلايا و تسريع نمو الشعر لأنه بيحفز الدورة دموية.

زيت البرجاموت: بيساعد على التئام الجروح و ليه خصائص مضادة للبكتيريا و الفيروسات اللي بتساعد على معالجة القشرة منغير متنشف الشعر لأنه كمان زيت مُرطب. بيقلل تهيج فروة الراس و تساقط الشعر.

زيت شجرة الشاي: الوحيد لكل مشاكل فروة الراس اللي ممكن تقابلكك. مضاد للبكتيريا، الفيروسات و الفطريات، بيحسن من مظهر الشعر في المُجمل لإنه بيحل مشكلة   انسداد بصيلات الشعر اللي بتأدي للتساقط و إبطاء نموه. مفعولة ساحر للشعر الدهني

بس خلي بالك: كوني حريصة على استخدام الزيوت الأساسية بكميات بسيطة لأن تركيزها عالي جداً، نقط قليلة منه كافية مع الكمية الأكبر للزيوت الوسيطة

✨الزيوت الأساسية حل رائع لمشاكل الشعر، بيعيدوا للشعر رونقه و جماله و صحته. و دايماً افتكري، فروة صحية يعني شعر صحي

Leave a Reply

Your email address will not be published.